Šta treba da uradite ako doživite sunčanicu: Prvi koraci prije dolaska Hitne
Sunčanica je vrlo ozbiljno zdravstveno stanje, koje nastaje izlaganjem glave, posebno potiljka, visokoj temperaturi, odnosno uticaju sunčeve toplote.
Prvi simptomi sunčanice su glavobolja, vrtoglavica, nemir, neraspoloženje, crvenilo lica i temperatura tijela viša od 38,9 stepeni. Kasnije se mogu javiti i zujanje u ušima, problemi s vidom i malaksalost, a moguća je i nesvjestica. Protiv sunčanice najbolja je prevencija, to jest ne izlagati se suncu u periodu od 10 do 17 časova bez prijeke potrebe, ali ukoliko dođe do ove neprijatne pojave, evo šta treba da radite, a šta da izbjegavate.
1. Sklonite se u hlad ili rashlađenu prostoriju i skinite sa sebe sve što je suvišno - čarape, cipele, kapu i višak odjeće kako biste ubrzali hlađenje.
Rashladite se umjereno hladnim tušem ili kadu napunite vodom. Stavite mokru krpu ili peškir na zadnji dio vrata, prepone i ispod pazuha. Ako za to nemate mogućnosti, poprskajte se vodom. Ako ste kod kuće, pokvasite pokrivač i pokrijte se. Osoba koja dobije sunčanicu ne smije da se rashlađuje alkoholom, jer će on previše brzo rashladiti tijelo, što može da dovede do opasnih varijacija u tjelesnoj temperaturi i šoka.
2. Lezite.
Kad dođe do sunčanice, moguća je i nesvjestica, pa je bitno što prije leći. Ako se osoba onesvijesti, okrenite je na lijevi bok (na toj strani je srce, pa će cirkulacija brže proraditi) i savijte joj lijevu nogu kako bi se održala ravnoteža.
3. Nadoknadite tečnost.
Pijte posoljenu vodu (kašičica soli na decilitar vode), jer ćete tako suzbiti dehidraciju i gubitak soli uzrokovan znojenjem. Ono što je važno da znate je to da kod sunčanice nikako ne smijete previše brzo piti vodu, inače može doći do šoka. Najbolje je popiti slanu vodu, ali ako je nemate pri ruci, pomoći će i obična.
4. Ostanite mirni.
Osobu koja dobije sunčanicu može uhvatiti panika, ali važno je ostati miran, a to je najlakše postići dubokim disanjem. Osjećaj uznemirenosti samo će ubrzati pumpanje krvi, što će dodatno podići temperaturu tijela. Lagano masirajte mišiće kako bi se pospješila cirkulacija krvi, a imajte u vidu da se kao simptomi sunčanice mogu javiti i grčevi u mišićima, naročito u listovima, što je jedan od prvih simptoma ovog stanja.
5. Ako glavobolja, vrtoglavica, nemir i crvenilo lica traju duže od sat vremena nakon odlaska u rashlađenu prostoriju, ne treba čekati, već je potrebno pozvati Hitnu pomoć.
Ne uzimajte nikakve lijekove na svoju ruku jer vam mogu samo pogoršati stanje.
Pratite nas na našoj Facebook i Instagram stranici i Twitter nalogu.
